:: منتدى شبابنا ::

عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي
:: منتدى شبابنا ::

منتدى الشباب منتدى متكامل به كل ماتتمناه به اقسام للكمبيوتر اقسام للترفيه المرئيات قسم للخريجين الطلبة المنتدى الاسلامى قسم الديكور والكثير الكثير


    جواب التعيين

    شاطر
    avatar
    سندباد
    رائد
    رائد

    ذكر
    عدد الرسائل : 194
    السٌّمعَة : 14
    نقاط : 268
    تاريخ التسجيل : 12/06/2008

    جواب التعيين

    مُساهمة من طرف سندباد في الخميس مايو 14, 2009 11:48 pm

    يااااااااااه يا جماعة ... يوم مش عادى .. يوم يكتب فى تاريخ اسرتنا العظيمة ... وليه لأ .. أصل ده اليوم اللى فيه جالى جواب التعيين من القوى العاملة .. بعد انتظار سنين ... ياسلااااااااااام .. آخيرا .. طولت الميرى وهاتمرمغ فى ترابه !!

    ففى هذا اليوم جاءنا السيد البوسطجى وخبط على باب بيتنا ... بس للأسف محدش فتحله !!

    المهم .. نزل البوسطجى فى اليوم ده بعد مايئس من كتر الخبط ليجدنى فى وجهه على السلم ( كنت لسه راجع بعد قضاء نصف يوم تقريبا فى التسكع يمين وشمال فى أرجاء المحروسة دون هدف انا ومجموعة من الشباب الطموح الذى يملأ بلدنا الحبيبة !! ) .. ودار بيننا هذا الحوار ..

    البوسطجى : لو سمحت يا محترم .. مش دى شقة الاستاذ سيد الشحات !!

    انا : آه هى بعينها .. أى خدمة !!

    البوسطجى : أومال هى مفيش حد فيها ولا ايه .. اصل ايديا ورمت من كتر الخبط !!

    انا : لأ ازاى .. دى شقتنا ... وأبويا جوا ... انا متأكد

    البوسطجى : اومال ما بيفتحش ليه يا عم ؟!!

    انا طارقا الباب بشدة : افتح يابا .. انا عارف انك جوا ومش راضى تفتح كالعادة عشان ماتدخلنيش ...

    صوت ابويا من الداخل : أرجع ياصايع مطرح ما كنت .. أحسن انا لو فتحت الباب هافتح بعديها نافوخك !!

    انا بأحراج من البوسطجى : آ .. نياهاهاها .. معلش اصل ابويا بيحب الهزار .. دايما كدة انا وهو ... ابن وابوه بقى !!

    البوسطجى بنرفزة : ربنا يخليكوا لبعض يا سيدى .. بس انا عايز اتنيل امشى .. انا زهقت !!

    انا : حاضر ياعم حلمك شوية .. افتح يابا انا مش لوحدى .. فى واحد معايا !!

    صوت ابويا من الداخل : خده .. وأنزل !!

    انا : اخده وانزل فين بس ... ده ضيف مايصحش !!

    صوت ابويا من الداخل : ضيف ؟!! ... ضيف مين ؟؟ .. تلاقيه واحد من أطفال الشوارع اللى انت سارح معاهم طول الليل ابوه طارده من البيت وجاى يبات عندى .. طبعا ... ماهم قالولك ان دى العربخانة اللى جايبهالك ابوك !!

    انا بنرفزة : وبعدين بقىىىىى ... يابا أفتح ده محضر من القسم !!

    البوسطجى : محضر ايه يا أخينا .. انا بتاع البوسطة !!

    انا : ياعم هى هاتلزق يعنى .. انا بقوله كدة عشان يخاف ويفتح !!

    صوت ابويا من الداخل : محضر من القسم ؟؟ ... يبقى أكيد جاى عشانك يا متسول .. خليه ياخدك وينزل بقى !!

    البوسطجى متدخلا : يا أستاذ سيد يا شحات افتح ابوس ايدك وخلصنى .. فى جواب مستعجل جايلك من البريد !!




    ====================




    بعد هات وخد .. ومهاترات وصلت الى النصف ساعة على باب منزلنا الموقر ... آخيرا .. فتح والدى الباب !!

    ابويا : نعمين !!

    البوسطجى : فى جواب جاى على العنوان ده .. للسيد عاطل سيد الشحات !!

    انا : ياعم .. ماتقول من الصبح ان الجواب ليا انا .. مانا واقف جنبك من الصبح اهو ... هات يا أخى !!

    البوسطجى بصدمة : هو انت عاطل الشحات ؟!!

    انا بنرفزة : يعنى انا واقف جنبك من الصبح عمال أقول افتح يابا .. افتح يابا .. هابقى مين .. مرات ابوك يعنى .. اسفوخس على دى غباوة !!

    طراااااااااخ ( صوت البوسطجى وهو ينبطح أرضا من هول الصدمة !! )

    انا : ايه ده ... هو اغم عليه ولا ايه ؟!!

    ابويا ببلاهة : لأ .. ده باينه مات ... خش وأقفل الباب وراك !!

    انا : !!!!!!!!!!!!!!!!!

    ودخلنا انا ووالدى المبجل .. وتركنا البوسطجى بالخارج .. غارقا فى احلامه !!




    ====================




    ابويا : هـــا ... فيه ايه بقى الجواب ده يا سيدى ؟!!

    انا بثورة فرح بعد قراءة الجواب : نياهاهاهاهاهاهاها ... انا اتعينت فى القوى العاملة يابا ... عاااااااااا ... عووووووووه .. عىىىىىى

    ابويا على طريقة فؤاد المهندس فى "عائلة زيزى" : وبقيت انـــا المديـــــــــــــــــــــــر !!

    أمى ممسكة بالكبشة وقادمة من المطبخ بلهفة : ايه خير ... فى ايه ؟؟؟؟

    انا : انا اتعينت فى القوى العاملة يامّه ... آآآآآآآآآآآآآآآآآآآآآآآآآآآآه

    امى : لولولولولولولولولى ... القوى العاملة مرة واحدة ؟؟!!!

    انا بمنتهى السذاجة : يا سلااااااااااااااام ... يا ترى هايمسكونى ادارة ايه ؟؟!!!!!

    ابويا بتريقة : هيئة الآثار بأذن الله !! ... انت متأكد ياض يا أهبل انت ان الجواب ده جايلك انت ؟!!

    انا بمنتهى التفاؤل والأمل : طبعا جايلى انا ... اهوه الى السيد "عاطل السيد الشحات" ... آخيرا هابقى مسئول كبير فى البلد !!

    ابويا ببرود : يللا .. فساد بفساد بقى .. يعنى هى جت عليك !!

    انا : لا وشرفك ... ده انا هابقى فى نزاهة عبد الناصر وفى قوة السادات ... اوعدك يوم ما هاتحال على المعاش هايحطوا تمثالى فى الميدان بدل تمثال مصطفى كامل !!

    ابويا : أقطع دراعى لو ماكانت نهايتك زى سليمان الحلبى !!
    avatar
    سندباد
    رائد
    رائد

    ذكر
    عدد الرسائل : 194
    السٌّمعَة : 14
    نقاط : 268
    تاريخ التسجيل : 12/06/2008

    رد: جواب التعيين

    مُساهمة من طرف سندباد في الخميس مايو 14, 2009 11:49 pm

    تانى يوم جهزت نفسى ... ولبست بدلة ابويا اللى خرج بيها على المعاش ... مش من حلاوتها طبعا ... بس لأن دى البدلة الوحيدة الموجودة بمنزلنا الموقر .. وابويا اصلا كان واخدها من جدى الله يرحمه بارضو ... يعنى بدلة عمرها أكثر من 80 عام !! ... فلكم ان تتخيلوا منظرها !!

    المهم نزلت من بيتنا فى الثامنة صباحا على غير العادة متوجها الى عنوان الوظيفة حيث مصلحة التليفونات ... ودخلت الى أحد المديرين كى يعتمد اوراقى ويعرفنى مهام وظيفتى الجديدة ( يا حلاوتك فى الميرى يا واد يا "عاطل" )

    المدير قارئا اوراقى : عاطل سيد الشحات ... بالذمة ده اسم ده ؟!!!

    انا : معلش بقى يا سيادة المدير .. ابويا اصله بيخاف عليا من الحسد ... فقال يسمينى اسم ماتسماش قبل كدة .. مع انى مش عارف انا في ايه فى حياتى يتحسد اصلا .. يمكن البدلة اللى انا لابسها !!

    المدير مكملا : بكالوريوس تجارة ... عازب ...

    انا مقاطعا : حضرتك كل الكلام ده انا حافظة .. ماهو ده ورقى سعادتك ... لايمنى بقى على الشغل الله يستر عرضك !!

    المدير ببرود : طيب يا سى عاطل ... اطلع استلم شغلك على ماكينة التصوير الخاصة بالمصلحة فى الدور الرابع !!

    انا مصدوما : مكنة تصوير ؟؟ ... انا بكالوريوس تجارة ... اقف اصور ورق ؟!!!

    المدير : والله دى الوظايف المتاحة عندنا يا حبيبى .. مش عايزها فى الف غيرك يتمنوها !!

    انا : لالالا .. خلاص يا بيه اصور ورق ... اهو حتى شغلانة مريحة ومافيهاش مسئوليات ولا مصايب !!

    المدير : ازاى ... الماكينة دى عهدة .. وورق التصوير ده عهده .. ولو ضاعت منك ورقة واحدة هاخرب بيتك ... انا عاددهم ورقة ورقة وكلمة كلمة !!

    انا : امرنا لله .. حاضر يا بيه ... طب كنت عايز اعرف ... بالصلاة على النبى كدة بالنسبة للمرتب .. يعنى حضرتك هايبقى ايه النظام يعنى ؟؟

    المدير : آه .. مرتبك هايبقى 97 جنيه ... بالحوافز والمكافآت يبقى كله كله ... 103 جنيه !!

    انا : لالالالالالالالالالا .. قليلين قوى !!

    المدير : ايه مش عاجبك المرتب ولا ايه ؟!!

    انا : لا .. انا مش عاجبانى الحوافز ... مش شايف ان 6 جنيه حوافز قليلين شوية ؟؟ ... ماتبحبها شوية يا راجل !!

    المدير : !!!!!!!!!!!!!!!!!!!!!!!

    انا : يعنى هو مش كفاية هاتوقفونى اصور ورق وساكت .. كمان مفيش فلوس !!

    المدير : يا إبنى انت لسه جديد وماتثبتش ... لما تتثبت مرتبك هايقفز بتاع 10 جنيه بحالهم !!

    انا على طريقة سعيد صالح فى "العيال كبرت" : يااااااااااااااه .. بيكسبوا بقى المصوراتية دول على كدة !!
    avatar
    سندباد
    رائد
    رائد

    ذكر
    عدد الرسائل : 194
    السٌّمعَة : 14
    نقاط : 268
    تاريخ التسجيل : 12/06/2008

    رد: جواب التعيين

    مُساهمة من طرف سندباد في الخميس مايو 14, 2009 11:49 pm

    رجعت بيتنا وانا أجر قدماى من هول الصدمة .. مصوراتى ... وبـ 103 جنيه فى الشهر .. وماشى احسبها .. طب انا لو كل يوم ركبت مواصلات رايح بحوالى جنيه ونص وجاى بحوالى جنيه ونص وابقى امشى باقى السكة يبقى كدة 90 جنيه فى الشهر ... ولو ضيفت عليهم ساندويتش فول بنص جنيه افطر بيه يبقى كدة 15 جنيه ... يبقى كله 105 جنيه ... يبقى انا عايز استلف 2 جنيه كل شهر عشان اشتغل !!!

    دخلت بيتنا وانا اضرب أخماس فى اسداس ...

    ابويا : ها .. عملت ايه ياعم أحمد يا عرابى !!

    انا بسخرية : عايزين يمسكونى منصب حساس اوى .. وانا متردد والله اوافق ولا لأ !!!!

    ابويا ببلاهة : لو "حرس الرئيس" ... وافق يابنى ... دول بيجيبولهم وجبات من "كوك دور " !!

    انا : !!!!!!!!!!!!!!!!!!

    امى : يا خويا أى شغلانة والسلام .. المهم المرتب كام يا بنى ؟!!

    انا : لالالا .. المرتب حاجة عظيمة ... مش عارف انا هاصرف المرتب ده فى ايه .. انا بفكر اتبرع بنص مرتبى لترميم البيت !!

    ابويا : كدة يبقى بترمى فلوسك فى الارض .. لأن البيت ده لو اترمم هايقع !! .. هو البيت ده كدة لو انضرب فيه شاكوش واحد هايتهد على اللى فيه .. انا شايف انه أحسن تحوش نص مرتبك ده مادام هو كبير كدة وبعد سنة ولا حاجة نشترى "اسماعيل بانجورا" !!

    أمى بلهفة : صــح والله ... انا من زمان وانا عايزة اجيب أباجورة احطها فى الصالون !!

    ابويا لأمى : ابجورة ؟.. وبعدين هو فين الصالون ده .. ده الشقة كلها اوضة وصالة ومطبخ وحمام مشترك مع الجيران !!.. خشى نامى يا ذينب !!




    ====================




    وبعد ما شرحت حقيقة الموضوع لوالدى الحالم ... وبعد ان أكتشف الحقيقة المرة !!

    ابويا : تصدق بالله .. انا لحد دلوقتى مش عارف احدد سبب خلفتى لك ... قوللى كدة انت فايدنى بأيه من يوم ما اتولدت لحد دلوقتى ؟!!

    انا : وانا مالى يا عم ... هو انا يعنى كنت لقيت شغلانة اصرف بيها على نفسى وقولت لأ ؟؟؟

    امى : وكسة توكسك اكتر ما انت موكوس يا موكوس يا ابن الموكوس !!

    انا : وبعدين بقىىىىىىىىى !!

    طق طق طق طق ( صوت الباب بيخبط )

    امى على الطريقة الشعبية : ميييييييييييييييييييييين ؟!!

    صوت من خارج الباب : بــــــــــــوســـــــطــــــــــة !!

    انا فاتحا : ايه ده ؟؟ ... انت تانى ... انت ياراجل انت مش كنت مت ؟!! .. ايه اللى رجعك تانى ؟!!

    ابويا ببلاهة : تلاقى النهاردة الخميس الكبير بتاعه !!

    البوسطجى : بقى كدة يا جدع تسيبنى المرة اللى فاتت مرمى على السلم ساعتين لحد ما السكان خدونى على الوحدة وفوقونى هناك على آخر لحظة قبل ما أطلع فى الروح ؟!!!

    ابويا : قصره .. عايز ايه ياعم العفريت ؟!!!

    البوسطجى : انتوا المرة اللى فاتت اخدتوا منّى جواب التعيين وما مضيتوش على الاستلام !!

    ابويا قابضا على يد البوسطجى : نمضى استلام على جواب التعيين ؟؟!!! .. ابو 103 جنيه ده ... اوى اوى يا حبيبى ... تعالى ادخل عشان نمضيلك ... اقفل الباب يا وله !!

    انا : حاضر يابا .. تحت امرك ... ادخل ياض !!

    البوسطجى برعب : هو فى ايه ... سيبنى ياعم انت !!

    طاخ .. آآآآآآآه .... طوخ .. آوووووه ... طيخ .. ايييييييه !!

    البوسطجى صارخا : الحقوناااااااااااى ... آآآآآآآآآآآآآآآآآه ... يا عالم .. يا هوووو ... طب انا ذنبى ايه ؟!!

    انا مرددا اغنية صباح : ذنبك بحبك !!

    ابويا مكملا : هو بعد الحب ذنب !!

    امى : يانا .. يانا ... لولولولولولولولولولولوى !!
    avatar
    القرصان
    نقيب
    نقيب

    ذكر
    عدد الرسائل : 128
    السٌّمعَة : 0
    نقاط : 178
    تاريخ التسجيل : 30/05/2008

    رد: جواب التعيين

    مُساهمة من طرف القرصان في الجمعة مايو 15, 2009 10:45 am

    هههههههههههههههه
    ده انت المفروض تسمى مواضيعك مغامرات السندباد
    avatar
    enangel
    ملازم
    ملازم

    انثى
    عدد الرسائل : 71
    السٌّمعَة : 5
    نقاط : 80
    تاريخ التسجيل : 12/05/2009

    رد: جواب التعيين

    مُساهمة من طرف enangel في الأحد مايو 31, 2009 9:29 pm

    هههههههههههههههه
    avatar
    سندباد
    رائد
    رائد

    ذكر
    عدد الرسائل : 194
    السٌّمعَة : 14
    نقاط : 268
    تاريخ التسجيل : 12/06/2008

    رد: جواب التعيين

    مُساهمة من طرف سندباد في الجمعة يونيو 05, 2009 8:29 am

    شكرا على ردكم ومروركم وسعيد ان موضوعاتى تعجبكم
    avatar
    سندباد
    رائد
    رائد

    ذكر
    عدد الرسائل : 194
    السٌّمعَة : 14
    نقاط : 268
    تاريخ التسجيل : 12/06/2008

    رد: جواب التعيين

    مُساهمة من طرف سندباد في الأحد ديسمبر 06, 2009 4:22 pm

    avatar
    braveheart
    ملازم اول
    ملازم اول

    ذكر
    عدد الرسائل : 80
    السٌّمعَة : 0
    نقاط : 38
    تاريخ التسجيل : 03/06/2008

    رد: جواب التعيين

    مُساهمة من طرف braveheart في الأحد ديسمبر 06, 2009 4:43 pm

    انا اما الاقلا موضوع لسندباد ادخلعلى طول علشان اضحك دايما بتضحكنا ياسندباد منتظرين الجديد
    avatar
    pirate
    نقيب
    نقيب

    ذكر
    عدد الرسائل : 148
    السٌّمعَة : 0
    نقاط : 318
    تاريخ التسجيل : 30/05/2008

    رد: جواب التعيين

    مُساهمة من طرف pirate في الأحد ديسمبر 06, 2009 11:28 pm

    هههههههههههموضوع جام\د يموت من الضحك
    ربنا يكفينا شر القوى العاملة
    avatar
    صابر المنياوى
    رائد
    رائد

    عدد الرسائل : 181
    السٌّمعَة : 2
    نقاط : 21
    تاريخ التسجيل : 15/05/2008

    رد: جواب التعيين

    مُساهمة من طرف صابر المنياوى في الإثنين ديسمبر 07, 2009 9:47 am

    هههههههههه حلو اوى ياسندباد بس ياريت تكتبلنا مواضيع زى دى كتير عاوزين نضحك
    avatar
    eed
    مشرف برتبة ( وزير )
    مشرف برتبة  ( وزير )

    ذكر
    عدد الرسائل : 2070
    العمر : 47
    الموقع : القليوبية
    العمل/الترفيه : فنى
    السٌّمعَة : 8
    نقاط : 655
    تاريخ التسجيل : 10/05/2008

    بطاقة الشخصية
    الاسم ثلاثى: النشاط
    العمر :

    رد: جواب التعيين

    مُساهمة من طرف eed في الإثنين ديسمبر 07, 2009 5:43 pm

    موضوع جميل جدا وفك عننا وضحكنا
    هو ده سندباد اللى ديما بيمتعنا بمواضيعة الجميله الساخره
    نتمنى تكون ديما معانا بصفه مستمره زى زمان


    _________________

      الوقت/التاريخ الآن هو الأحد ديسمبر 16, 2018 5:05 pm