الكمبيوتر‏..‏ صديقي !!

غرباء داخل جدران أربعة
‏**‏ هل فكر أحد منا ان يجلس مع ابنه أو ابنته ولو ساعة زمان واحدة‏..‏ يتحدثان حديث الكبير للصغير‏..‏ أم أننا كلنا مجرد ركاب قطار‏..‏ بلا محطة وصول‏!**‏
قالها لي شاب في نحو السابعة عشرة يدخل امتحان الثانوية العامة بعد أيام‏:‏ يا أونكل الكمبيوتر هو صديقي الوحيد‏..‏

قلت له‏:‏ ازاي يا عم مدحت؟
قال‏:‏ باتكلم معاه‏...‏ وأجد معه متعة ما بعدها متعة‏..‏ وهو يحفظ كل أسراري‏..‏ مثل أبوالهول يعرف ولا ينطق‏..‏ أتحاور معه وأسأله ويجيبني في أي شئ وفي أي وقت ومن خلاله أشوف العالم كله لما أدخل علي شبكة النت‏..‏

قلت‏:‏ وإلي من تشكو همك؟
قال‏:‏ أنا همومي ليست كثيرة ولا كبيرة‏..‏ والحوار مع أصدقائي كفيل بإزالة أي هم‏,‏ وأي لغم صغير قبل أن ينفجر‏!‏

قلت‏:‏ أمال فين بابا‏,‏ فين ماما‏..‏ فين اخواتك في البيت؟
قال‏-‏ وكأنه حفيد أرسطو الفيلسوف‏-‏ يا أونكل في الزمن اللي احنا فيه ده كل واحد في حاله‏..‏ ماحدش فاضي لحد‏..‏ ماحدش بيفكر إلا في نفسه وبس‏..‏ كل واحد وهمه‏..‏ يحل مشاكله هو الأول‏..‏ وبعدين يبقي يحن علي الآخرين‏!‏
يقطع حواري مع فتي الثانوية العامة نداء والده لنا لأن السفرة جاهزة‏..‏ أخذنا أماكننا علي عزومة الغداء في بيت صديق عزيز هو نفسه والد صديق الكمبيوتر‏..‏

أسأل الأب‏:‏ هو ابنك في سنة كام؟
يرد بسؤال لزوجته‏:‏ أفتكر في آخر سنة في الثانوية العامة موش كده واللا إيه؟
الأم بسخرية متوارية‏:‏ هو انت حتفتكر إيه واللا إيه‏..‏ هو انت فاضي لحد‏..‏ غرقان لشوشتك في أخبار البورصة والبنوك‏..‏ بذمتك ودينك انت فاكر بنتك بتدرس إيه في الجامعة الأمريكية؟
يرد بسرعة‏:‏ أفتكر تجارة خارجية‏..‏
الأم تصحح‏:‏ لا‏..‏ إدارة أعمال‏.‏

الأب‏:‏ ماتفرقشي كتير‏..‏
البنت الكبيرة زي فلقة القمر تدخل وتحيي وتسحب كرسيا إلي جوار أمها في مواجهة أبيها الذي توجه له الكلام‏:‏ ماتنساش يابابا فلوس الرحلة‏..‏ وموافقة حضرتك وإمضاءك الكريم تطلعه وأنت ساكت عشان يطلعوني معاهم‏..‏

الأب يسأل‏:‏ هما عاوزين كام؟
البنت التي مثل فلقة القمر‏:‏ ثلاثة آلاف دولار بس‏..‏ وهنروح ياسيدي باريس ولندن‏..‏ أسبوعين بحالهم‏.‏

الأب‏:‏ بكرة عدي عليا في المكتب خدي الفلوس والموافقة‏!‏
صديق الكمبيوتر محتجا‏:‏ تلات تلاف دولار حتة واحدة‏..‏ يعني حوالي‏18‏ ألف جنيه‏..‏ لكن لو أنا طلبت لاب توب تقولولي ما عندك الكمبيوتر‏,‏ ماله وحش‏..‏ أو أطلب موبايل جديد‏..‏ تقولولي لما ياحبيبي تخش الجامعة‏..‏ طيب أنا لما أخش الجامعة‏..‏ عاوز عربية زي الست أختي بتاعة الجامعة الأمريكية‏!‏

الأب‏:‏ انت ياحبيبي راجل تستحمل تركب عربية المدرسة لكن اختك بنت واللا يعني موش خايف عليها‏!‏
الأم بتهكم‏:‏ ياراجل‏..‏ يعني سايب بنتك تسافر لوحدها مع بنات وشباب أوروبا‏..‏ انت عارف يعني إيه أوروبا وموش خايف ولا حتي قلقان عليها؟
البنت في صوت كالصراخ‏:‏ احنا ما صدقنا بابا وافق‏..‏ عاوزة تقوميه عليا واللا إيه ياست ماما‏!‏

الأب‏:‏ خليها تروح تشوف الدنيا‏..‏ ما تخافيش عليها‏..‏ أنا بنتي راجل‏..‏ راجل بشنب ودقن‏!‏
أتدخل مشيرا إلي البنت التي مثل فلقة القمر‏:‏ هي دي برضه راجل بشنب ودقن يا مختار بيه؟

يحمر وجه الفتاة‏..‏ بينما يضحك صاحب الدار وهو يقول‏:‏ دي بنت مجدع تخش في الحديد‏..‏ ياللا بقي نخش في الأكل‏..‏ المدام عاملالك ديك رومي بالخلطة أصلك عزيز عليها قوي‏..‏ موش بلدياتك يا عم‏..‏
ونحن نشرب فناجين القهوة في الصالون الكبير أخذت صديق الكمبيوتر جانبا وقلت له‏:‏ طيب ما البيت هايص وباباك ومامتك بيتكلموا معاك أهه وبتاكلوا سوا‏..‏ أمال إيه مافيش ليا صديق إلا الكمبيوتر‏!‏

قال‏:‏ ده بس قدامك النهاردة‏..‏ لكن تعالي ساعة الغداء أو العشاء في أي يوم تاني‏..‏ تلاقي الدنيا هس هس‏..‏ وكل واحد بياكل لوحده‏!..‏
ده حتي الفطار كل واحد يخطف له لقمة علي كباية شاي بلبن ويفلسع‏!‏
قلت‏:‏ وعرفت كمان كلمة يفلسع‏!‏
قال‏:‏ أيوه‏..‏ وفيه يشطح وينطح ويبرطع ويطرقع ويبعبع ويلسن ويبلسن ويشنفر ويخنفر ويصنفر ويعفر‏..‏ والكلمة الأخيرة يعني يطرقع له سيجارتين بعيد عن عيون الأب في الحمام واللا في أوضته أو في الجنينة‏..‏

أسأله‏:‏ وانت بتطرقع سجاير واللا بدري عليك؟
يقول هامسا‏:‏ ساعات وساعات‏..‏ آه لو بابا يعرف إن أختي عندها في أوضتها علبة سجاير أمريكاني‏!‏
قلت‏:‏ لكن ماما أكيد عارفة‏..‏ وعارفة كمان كام سيجارة بتطرقعها انت كل يوم‏!‏

يسألني‏:‏ إيش عرفك بقي‏!‏
قلت‏:‏ بالحداقة كده‏..‏ أصل الأم في زماننا ده تحب تخبي علي عيالها‏..‏ يعني تداري ولا تداوي‏..‏

يقول‏:‏ أيوه عارفها‏..‏ والأب زي ما بتقول يصرف ولا يعرف‏!‏
قلت‏:‏ عليك نور ياصديق الكمبيوتر‏

نجيء للسؤال الصعب‏..‏ بل لعله أصعب سؤال ممكن أن يواجهه الأب في حياته كلها‏..‏
وكأننا نعيش أحداث فيلم عربي من أيام أفلام الأبيض والأسود بتاعة زمان‏..‏ تجيء الفتاة الحلوة المتعلمة بنت الأصول لتفاجيء أباها بعد أن ختم صلاة العصر‏,‏ وقبل أن يسحب السجادة ويطويها‏:‏ يا بابا أنا عاوزة أتجوز فلان؟

يبتلع الأب السؤال وينتبه قليلا ويجلس علي الكنبة المقابلة وهو يسأل ابنته الشابة الحلوة بنت الأصول‏:‏ واشمعني فلان ده بالذات‏..‏ انت تعرفيه؟
البنت دون أن يطرف لها رمش‏:‏ أيوه يابابا كان زميلي في الجامعة‏..‏ وكنا‏..‏ وكنا‏..‏

الأب‏:‏ كنتم بتحبوا بعض موش كده‏!‏
البنت تطرق خجلا في زمن ضاع الخجل فيه من سحنة كل البنات‏..‏ ولا ترد‏..‏

الأب يبحث في درج مكتبه عن علبة سجاير‏..‏ لكن الابنة تذكره‏:‏ انت يا بابا مبطل تدخين من عشر سنين‏!‏
الأب‏:‏ كلامك فكرني بالسجاير‏..‏ أمك عارفة حكاية الواد زميلك ده‏..‏ بالطبع عارفة ومخبية عليا كالعادة‏.,.‏
البنت وقد زال خجل العذاري من وجهها‏:‏ أيوه وهي موافقة‏..‏ بس انت ترضي‏!‏
بضع حبات من العرق تندي جبين الأب‏..‏ لا يعرف بما يجيب إلا أن ينادي علي زوجته التي تحضر صامتة فهي التي رسمت الملعوب كله مع ابنتها الشابة‏,‏ وربما جلست مع الشاب وتحدثت معه والأب في عالم آخر‏..‏

الأب يرسل من فمه تنهيدة طويلة وهو يقول‏:‏ يعني طبختوا الطبخة سوا وفاضل بس إني أدوقها وأقول حلوة والله‏..‏
الأم تتكلم لأول مرة‏:‏ شوف الولد الأول وبعدين قول آه‏..‏ أو لأ‏..‏

الأب بحيرة‏:‏ بس ده لسه تلميذ بياخد مصروفه من أبوه‏..‏
البنت‏:‏ أبوه تاجر كبير والولد حيدير تجارة أبوه بعد ما يتخرج‏!‏

الأب وهو يقوم من مقامه وقد سلم الراية‏:‏ خليه يتهبب ييجي ومعاه أبوه وأمه موش لوحده‏!‏
البنت هنا هي التي اختارت
والأم عامت علي هوي ابنتها
والأب رضخ في النهاية لاختيار البنت وأمها‏..‏
المشهد الأخير بعد سنة في رواية حسن الإمام‏:‏
في محكمة الأسرة‏..‏ الابنة تطلب الطلاق‏..‏ لأن‏:‏
‏*‏ الولد طلع موش راجل‏!‏
‏*‏ وأبو الولد طلع مسجل خطر ويتاجر في المخدرات‏!‏
‏*‏ وأبو البنت طريح الفراش نكدا وحزنا‏!‏
ألستم معي أننا نعيش غرباء في بيوتنا؟
‏
...................‏
‏....................‏
كم هو مؤلم‏..‏ كما قال لي طالب عمره يقترب من العشرين‏..‏ أن تجد نفسك غريبا في بيتك‏!‏
وعندما قلت له‏:‏ المؤلم أكثر أن تجد نفسك غريبا في وطنك‏,‏ لا أحد يفهمك‏..‏ لا أحد يسمعك‏..‏ لا أحد يريد أن يفهمك‏..‏ لا أحد يريد أن يسمعك كأنك تؤذن في مالطة‏.‏

قال بانفعال‏:‏ ياسيدي‏..‏ الغريب في داره غريب في وطنه‏..‏ نحن أبناء هذا الجيل ينطبق علينا تماما المثل الشعبي نؤذن في مالطة‏!‏

أسأله‏:‏ إزاي؟
قال‏:‏ نحن أربعة أخوة وأخوات‏..‏ أبونا رجل ميسور الحال جدا يتنقل بين عواصم العالم لمتابعة حركة تجارته وأعماله الواسعة‏..‏ ولا نكاد نراه إلا مرتين كل عام في العيد الصغير والعيد الكبير‏..‏ وكل واحد فينا لديه عربية آخر موديل‏,‏ ودخل شهري محترم‏,‏ لكن كل واحد كأنه يعيش لوحده في هذه الدنيا‏,‏ يفعل ما يروق له دون أن يحاسبه أحد‏..‏ والحمد لله نحن حتي الآن ناجحون في مدارسنا وجامعاتنا‏..‏ يعني أقعد في البيت‏..‏ أبات مرة عند أصحابي‏..‏ أسافر الغردقة‏,‏ أو حتي باريس‏..‏ أروح أرجع مافيش حد بيقوللي انت بتعمل إيه‏..‏

أسأله‏:‏ وإخواتك البنات الشيء نفسه؟
قال‏:‏ أيوه‏..‏ لأن ماما أسبور قوي وسيدة مجتمع وعندها صداقات كثيرة وعندها أعمالها برضه هي اللي بتديرها وبتحقق لها ربح كبير قوي‏..‏

قلت‏:‏ طيب مافيش مشكلة هنا‏!‏
قال‏:‏ لا‏..‏ فيه‏..‏ كأني عايش في الدنيا دي لوحدي‏..‏
قلت‏:‏ موش عندك أصحابك وصاحباتك؟

قال‏:‏ أيوه‏..‏ لكن الفلوس‏+‏ أصحاب وصاحبات موش كل شيء‏..‏ أنا حاسس بوحدة فظيعة‏..‏ كل ما أصادف مشكلة أكلم بابا في التليفون في أي بلد هو نازل فيه يقوللي‏:‏ يابني انت بتعطلني علي موضوع هايف زي ده‏!!‏
أروح لماما‏..‏ تبوسني وتقوللي أنت راجل دلوقتي‏..‏ اعتمد علي نفسك وحل مشكلاتك بنفسك انت موش صغير‏!‏

أسأله‏:‏ وإيه هي المشكلة اللي محيراك؟
قال‏:‏ أقولك بس بلاش أسماء لأحسن حد يعرف‏!‏
قلت‏:‏ حاضر‏.‏
قال‏:‏ أنا بحب واحدة زميلتي في الجامعة وما أقدرش أبعد عنها أبدا‏.‏
قلت‏:‏ قول لأبوك أو أمك تخطبها لك لحد ما تتخرج‏!‏

قال‏:‏ أبويا علي التليفون من نيويورك قال لي‏:‏ بلاش لعب عيال‏..‏ فرفش‏..‏ حب‏..‏ العب‏..‏ لكن جواز دلوقتي لأ؟
قلت‏:‏ وأمك؟

قال‏:‏ قالت‏:‏ ياننوس عين أمك عاوز تتجوز‏..‏ وأنت عندك اثنين وعشرين‏..‏ وملهوف ليه علي الهم ده بدري‏..‏ لما تتخرج يا حبيبي تعالي أجوزهالك‏!‏
قلت‏:‏ وعملت إيه؟

قال‏:‏ اتجوزتها من وراهم‏!‏
قلت‏:‏ اتجوزتها ازاي وانت لسه بتاخد مصروفك من بابا وماما؟

قال‏:‏ اتجوزتها عرفي زي ما بيحصل في الجامعة دلوقت‏..‏ من غير ما أهلي يعرفوا ولا حتي أهلها اللي رفضوا أخطبها لوحدي إلا إذا حضرت أمي أو أبويا معايا‏!‏
أسأله‏:‏ وبتتقابلوا ازاي؟
قال‏:‏ دي موش مشكلة‏..‏ المشكلة انها حامل دلوقتي‏..‏ وموش عارفين نعمل إيه في المصيبة دي‏!‏
قلت‏:‏ مافيش حل إلا أنكم تعترفوا لأهاليكم وأهلك وأهلها يشوفوا حل‏!‏
يسألني‏:‏ وإيه هو الحل‏!‏
قال‏:‏ هو فيه غيره‏..‏ الزواج الرسمي واللي كان في الخفاء يظهر فوق السطح وأمام كل الناس‏..‏ وشيل ياعم الهم بدري‏!‏

وإذا كنا نعيش عصر الكآبة المنزلية والانعزال النفسي العائلي والانفصال الأسري‏..‏ في ظل بيت بلا قائد‏,‏ وشباب ضائع هائم بلا مستقبل‏..‏ يعيش في ظل شجرة الأمل‏..‏ بلا عمل‏..‏ بل إن الحكومة الإلكترونية المصونة قطعت عنها الماء لتذبل أوراق العمل وتسقط خطابات التعيين في وحل الطريق بحجة أن الحكومة موش قادرة‏..‏ وعلي كل شباب مصر أن يطرقوا أبواب العمل الخاص ليتلقفهم زبانية السوق الحرة والعولمة والتجرمة وبيع كل شيء في المزاد العلني‏..‏

وإذا كان هذا هو حال شبابنا الحائر الضائع المكتئب‏..‏ فلا بأس ولا مناص ولا مفر أن نتابع وقائع هذا المشهد الميلودرامي المؤلم الذي لو شاهده مخرج الروائع والأحزان حسن الإمام‏..‏ لجعله مقدمة لفيلم عنوانه‏:‏ دموع علي شاطئ النيل‏!‏

كان الوقت ـ كما يقول أهل بلدنا ـ صفاري شمس‏..‏ يعني عندما تتكسر حدة الشمس العفية وتهبط غروبا‏..‏

المكان‏:‏ هو كوبري الوراق أطول كباري النيل‏..‏ علي يمينه القاهرة الصاخبة وإلي يساره صعودا مع التيار بلد الجمال والدلال والخضرة والزهور‏..‏ القناطر الخيرية‏..‏ حسب أقوال عم شمس بائع حمص الشام علي الكوبري في محضر الشرطة‏.‏

أنا شفت شاب كده طول بعرض بالصلاة علي النبي كان لابس قميص مخطط وبنطلون كاكي‏..‏ جالي وقاللي‏:‏ وحياتك الجواب ده ابقي سلمه لأبويا‏..‏

سألته‏:‏ وأبوك ألاقيه فين إن شاء الله؟
قال لي‏:‏ هو هييجي هنا هييجي‏..‏ بس قول له ده جواب من ابنك صبحي وهو هيفهم كل حاجة‏!‏

أنا يادوب خدت منه الجواب‏..‏ وبصيت لقيته ركب سور الكوبري وراح ناطط في البحر‏..‏ غطس ماقبش تاني‏!.‏

ماذا تقول سطور خطاب أخونا صبحي المحفوظ في محضر تحقيق النيابة؟
‏**‏ بابا ما تزعلش وقول لأمي ما تعيطش عليا‏,‏ أنتم ذنبكم إيه علمتوني لحد ما أخدت الليسانس‏..‏ وبعدين سنة ورا سنة مافيش شغل‏..‏ أصبحت عالة عليكم‏..‏ خللوا بالكم من اخواتي خصوصا لمياء أختي الصغيرة اللي كانت دائما ما تسيبنيش طول الليل وأنا بأذاكر‏..‏ أنا ما تكلمتش مع أي حد منكم‏..‏ انتم في وادي وأنا في وادي‏..‏ ياريت كنت اتكلمت معاكم‏..‏ يمكن ما كنتش زعلتكم بعملتي دي‏..‏ ربنا يغفر لي وليكم‏!‏
انتهي خطاب صبحي‏..‏ الغريب في وطنه‏..‏ الغريب في بيته‏..‏ ما أقسي أن يجمع الإنسان بين الغربتين‏!‏
‏

‏..............‏
أين ذهبت لمة العيلة‏..‏ أين ذهب الونس؟
اصبحنا نعيش في لوكاندة اسمها البيت‏..‏
نأكل ونشرب وننام وكأننا ركاب قطار مسافر بلا محطة وصول‏!


المصدر : الأهرام - عـزت السـعدني

ايه الحكايات الجامده دى يا عم شادى



بس بلاش تكتبها تانى علشان انا قلبى بيوجعنى من حكايات الطبقه الارستقراطيه"طبقة الاغنياء"