الموضوع ده علشان خاطر اسيرة الصمت واطلال (اى خدمه)

السلام عليكم ورحمة الله
الموضوع ده علشان الاعضاء كلها تعرف ايه اللى بيحصل لطلبة كلية الطب

وطبعا انتوا عارفين ايه اللى بيحصلهم

الموضوع ده عن يوميات طالب فى
كليه طب
شوفوا اللى حصلوا


طبعا زى مانتم عارفين صبحت الصبح فى المدينه الجامعيه اللى حضرتى باسكن فيها أنا وزملائى من الرجال وكأنها محمية ذكور المهم بعد ماصبحت قمت رايح على السخان عشان أترجاه انه يشتغل اوعى ييجى فى ذهنكم انه سخان مايه بعد الشر ده سخان كهربا بنعمل عليه شاى وكده المهم بعد ماترجيت ساعته وبست السلك بتاع حضرته عشان يشتغل سخنت عليه طبق الفول العال اللى يشد حيل أربعه من الجمال وعليه كوب من الزيت اللى ماتلاقيش زيه عندكم فى البيت وده طبعا من حلاوته ولونه اللى قرب يبقى زى لون البنزين بس من النوع النضيف بنزين 80 المهم ربنا قوانى وقمت بالطبق كله وغمست ب3 ارغفه بتوعى وقمت حبست بكوباية شاى متينه وطبعا كنت شاحت الشاى والسكر لكن الحمد لله النعناع اللى كنت حاطه عليها ماكنتش شاحته لأنى كنت شاحت بزياه اليوم اللى قبله المهم قمت لبست هدومى ولفحت البالطو الأبيض على كتف والسماعه على الكتف التانى قال ايه السما بتمطر ملايكه أنا طبعا باعمل كده عشان يمكن ربنا يكرمنى بواحده حلوه أقابلها فى الأتوبيس أقعد جنبها نتكلم والطريق يمشى بسرعه وياريتنى مارحت المستشفى ولاجبت بالطوهات من أساسه المهم دخلت الأتوبيس وقبل مادور بعينى على الجميله صاحبة النصيب اللى حاقعد جنبها ربنا كرمنى بواحد اعتقدته ان الكمسرى طبعا شاف البالطو قام قاللى لو سمحت ياضكتور قلتله اسمها دكتور قال المهم أنا عايز أسألك سؤال قلتله اسأل قلت يمكن الكلام ياخدنا وينسى ياخد منى تمن التذكره ماهو ياما أخدو منا حق تذاكر المهم قاللى والدتى عندها الكبد وأنا بخاف أكل معها واسلم حتى عليها أعمل ايه أنا خايف طبعا أخوكوا سمع كده عمل فيها الطبيب الهمام قمت منشف نفسى ورافع اكتافى قال ايه الباشا حيجاوب حطيت ايدى على كتفه وقلتله بص شوف ياابنى مافيش حاجه اسمها الكبد راح فرح الراجل وقال ياااااه يعنى دى كلها اشاعات ومافيش حاجه اسمها كبد أصلا قلتله لأ يا ناصح أنا قصدى انه مفيش مرض اسمه الكبد الكبد ده عندى وعندك وبيصاب بأمراض كتيره اللى منها وأخطرها الفيروسات الكبديه والفيروسات دى كتير أهمهم A , B , C ,D وقعدت أشرحله وقلتله A,E بيتنقلو عن طريق الأكل والشرب يعنى الأكل الضارب زى اللى موجود فى عربيات الفول اللى ماليه مصر كلها واللى شخصيا مندوب دائم عليها صباحا ومساءا وطبعا الشرب يعنى الماء الملوث عشان كده بيييجو للعيال الصغيرين أكتر لأنهم دايما هما اللى بيرمرموا . لكنB,Cبيتنقلو عن طريق الدم( الدم يعنى نقل دم ملوث أو سرنجه ملوثه بدم وعن طريق عمليات غسيل الكلى ) أنا قلت الكلام ده كله ولقيت الراجل وشه احمر ولقيته جمع قواه فى قبضة ايده وعايز ياخدنى بالبونيه فى وشى ولقيته بيقول ده كله عند ماما ياسوادى عليكى ياما قلتله لأ يابنى أكيد أمك عندها فيروس واحد قال اه عندها فيروس سى قلتله خلاص كده يبقى تمام عيش مع والدتك عادى كأنى مافيش حاجه أصلا واشرب معاها وعيش براحتك معاها بس حاسب لدمك ييجى على دمها من جرح مثلا أو حاجه زى كده طبعا أنا بقول كده وبادعى ربنا انه ينسى التذكره وفى اللحظه دى لقيت واحد أسمر لابس بدله سمرا وطاقيه برده سمرا وفيه مسدس فى جنبه وعليه حاجات بتلمع على كتفه تقريبا والله أعلم بيقولوا عليه ظابط لقيته مسك الراجل اللى أنا كنت فاكره الكمسرى ولقيت بيقوله أخيرا وقعت ياسمكه ومين ده شريكك هاتوهم وأخدونا على القسم من غير مانطق بحرف واحد وطبعا الظابط دخلنى أوضه وراسه وألف سيف أقوله سمكه مخبى الحشيش فين بس الراجل بصراحه أكرمنى أخر كرم (اوعى حد يضحك ويفكر انه عمل لى حاجه) أبدا بس من ساعتها وأنا أسفل راسى أحمــــــــــــــــــــــــــر مع أنى ماأخدتش الا 16 قلم على غفله وطبعا خرجت من القسم ومن ساعتها بحط ايدى على قفايا بلاقيه دافــــــــــــــــــــــى حتى فى عز السقعه ومن ساعتها وأنا بحط البالطو والسماعه فى كيس وبقيت أسمع اسم الكمسريه بصدع

علقه تفوت ولا حد يموت
تعيش وتاكل غيرها يا دكتور

اية الكلام ده يا تيتو لو دي يوميات طالب جامعي محدش ها يخش طب علي كده

ايه يا عم ده
بس شكرا اوي ع الموضوع الرائع ده
واحب اقولك ان انا واسيره الصمت مش بنشيل الباطو على ايدنا
بس ده مش للسبب اللي انت قلته
لسببين الاول والاهم عشان الناس متفتكرش اننا بنتمنظر بيه ونبين يعني للناس اننا ف طب وكده يعني
والسبب التاني عشان الباطو ميتوسخش لانه اكمنه ابيض بيتوسخ بسرعه جدا
وبعدين يا تيتو الواد اللي بيحكي ده مش ف طب
عارف ليه لان محدش ف طب بيشيل سماعه ده ف الافلام بس
وحتى لو ف طب احنا بقا ف طب اسنان
يعني بنشيل
شنطه العده (ربنا ما يوريك اصلها شبه شنطه الميكانيكيه )هههههههههههه
والله فعلا اعرف حد ف اسنان كان ف الاتوبيس زي صاحبنا ومعاه العده الكمسري قاله وسع كده يا اسطى وافتكره صبي ميكانيكي
ادي اللي بيجرالنا من ورا الطب وسنينه

هههههههههههه
موضوع جامد ياتيتو
شكرا يانجم