مكتبة الشعر الحلمنتيشي

القصيده الاولى:



أوتوبيس 106



أنا يوم من ذات الأيام
قلت أروح على خالتي وأزورها
وساعتها كان عندي زكام
ومناخيري غرقانه في بحورها
***
كات ساكنه في ميدان الأوبرا
بعد عمارة خالي بحِته
وركبت انا وفـ عز المطرة
علطول أتوبيس 106
***
أنا قلت أهي حاجه توَديني
بدل اللطعه اللي انا ملطوعها
وألاقيلك طلعت مصاريني
من واحده خَبَطِتني بِكوعها
***
قلتلها ما تحاسبي يا حاجه
انا بطني مش حِمل إيديكي
إدتني كده قرصين عجه
وقالتلي معلش يا كيكي
***
القصد انا سِبْتِلها مكاني
وقلت أقوم لَحْسن دي تخينه
وألاقيلك بعدها بثواني
في محطة قبل البنزينة
***
واحد طالع ماسك شنطة
ومن شكله هَتْقول دكتور
وأتاريه بيبيع لِنا في أونطة
وطلعت أنا كده حتة طووور
***
قبل البيع بيقول تعويذة
ويقولك بجنيه الواحده
ترسى على 12 ببريزة
وبضاعته علطول مِتْاخده
***
والناس بِتْدوس لك على رجلك
في الثانيه ييجي خمسين مره
وتبص تلاقي كده صوابعك
مـِ الجزمة خارجين على بره
***
وخناقه في أخر العربيه
واتنين ماسكين في شعور بعض
شديت واحدة من الجلابية
قام عشرين جايبيني الأرض
***
وقالولي يا واد انت يا حشري
إش دخلك وخدوني بالبوكس
أُغم عليا فجابولي كشري
مِـ الدوخه انا قلت سوبر لوكس
***
وأما وِقِفْت وقُمت خلاص
قلت أسند على أي عمود
ولقيت شحط شايل بلاص
على كتفه بينقط دود
***
قُلتِله تِسمح تتاخر
علشان دودك جه على وشي
قام قاللي ما تجيب من الآخر
شكلك كده جَرْفان من مِشٍي
***
قمت أنا سايبه وباعد عنه
وواقف كده في الناحية التانيه
ولقيت واحد باين إنه
شكله مدرس أد الدنيا
***
قُلتِله لا مؤاخذه بَشبِه
متكونش إنت الأستاذ عطوة
وأتاريه حرامي ولما إتنَبِه
قام لافف وفاتحلي المطوه
***
وقايلي طلع يا عين أمك
كل اللي معاك من نقدية
هتسَوًط تلاقيني هَغُزك
وإديني كمان الساعه ديه

القصيده التانيه:





يوميات قهوجي



مشهد أول على شخص بيصقف للقهوجي ويحضر القهوجي ويقوله


تِشرب كُباية شاي
مَظْبوطه ولا تِقيله
والسكر عايزُه إزاي
إنت هتاخد تعسيله
****
الناس قرفاني يا سيدي
ده يقول كبايه متينه
والتاني بيِمسِك ايدي
ويقول هات في الخمسينه
****
والتالت جِه يضْرب بإيديه عالطاوله يقولك دُش
قام فالت كده فنجان القهوه وبص وقال يا طرُبْش
****
ومعلم دومه بيِشْتْم
في الرايح أو في الجاي
كان دايخ شكله مبَرشِم
بيقول هات ياااض الشاي
****
وشَتَمني وانا من خيبتي
معْرِفتش أرد عليه
ماهو بنته تبقى خطيبتي
وبقوله ساعات يا أبيه




القصيده الثالثه :




مذكرات يائس
أنا لقمه بايته جنب حيطه في حته ضلمه أكلها كلب
أنا نكته بايخه أو عبيطه سمعها واحد مات وطب
أنا بيض ممشش ريحته وحشه ونحس دايم مستمر
أنا طير معشش في الترب فكر في مره يستقر
انا صوت بعيد دبحة وريد وشوكه في زور واحد جعان
انا طبعا غير فنان فريد وبيطلق لمشاعره العنان
أكيد هقول في مره لأ وأقوم وأقف على رجلي
لقيت طلعلي في رجلي شق وضعت وراح خلاص حلمي
فكرت في مره اكون شجاع وازعق بصوتي الناس تخاف
و طلعت في الآخر بتاع أو بير غويط جاله جفاف
هييجي اليوم أكيد هييجي وأزحزح الطوبه التقيله
وهبقى محمود المليجي وعمري ما اتنيل بنيله
وعمري ما أضعف أو أإن وهفتري عالخلق كله
ولا عمر يوم يركبني جن وهنسى ماضيه وذله
ولا هبقى طيب أو كريم بالعكس لازم ابقى عنتر
والناس هتبقى عب حليم والباقي يبقى عبله واكتر
المصدر :
http://www.dvd4arab.com

القصيده الرابعه





حالتي متأخره




حالتي متأخرة ... وحياتي راجعه لورا
أنزل وأديها زقه ... واقفه ومحجرة
طاب بس يا ناس قولو لي ... حلا للمسخرة

مستني معجزة .... مخلوق للنرفزة
كدة أهو من أي حاجة .... وبحب المشورة
حالتي متأخرة

الناس أعصابها باردة .... عايشين تحت المخدة
حتى دقات قلوبهم .... نايمة ومشخرة
حالتي متأخرة

بسأل في ده وده .... جاوبوني مش كدة
ساعدوني مش هينفع .... دة أنا أصلي كوز درة
حالتي متأخرة

دي حياتي يا ناس قرف .... وعايشها للأسف
وأما أحكي لحد عنها .... بيدور كركرة
حالتي متأخرة



القصيده الخامسه:





نظره مستقبليه



إطلع بقه م المية العكرة وخد غطسين على بره
نضف مخك بص لبكرة وإنسى الماضي لمرة

لف ودور في الأرض الواسعة خد من غيرك عبره
علشان توصل لازم تسعى وتسيبك م الذكرى

كوم القش ده يبقى الدنيا وانت يدوب الإبره
كون الأول نط في ثانية وإطلع سلم بكره

خد بالك دايماً م الفرصه دي ما بتجيش غير مره
يتكون كده موكوس ميت وكسه يا هتكتشف الذره

إوعى تقول بكره هتتعدل ومتمشيش بالقدره
إسعى وربك يوم هيسهل واخرج بقه م القِدره

وأما هتوصل عارف دورك فاكر كنت البذره
ينزل دمعك يسقي جذورك يصبح اسمك شجرة

القصيده السادسه:





صديقي الغلبان



مسكين وحاله حال *** بكاني على حاااااله
غلبان وعنده عيال *** والصبر راس ماااااله
وليل نهار شغال *** زي الحمار حاله
ما الارض مش أرضه *** والمال مهوش ماله

شغال وبيحارب *** في الفقر من بيت بااااب
من الحزن ليه نايب *** وإن قال فرح كدااااب
ولربه جه تايب *** وربك التواااااب
رجع اللي كان غايب *** لأهله وعياااااله

مسكين وحاله حال *** بكاني على حاااااله
غلبان وعنده عيال *** والصبر راس ماااااله
وليل نهار شغال *** زي الحمار حاله
ما الارض مش أرضه *** والمال مهوش ماله

والله ماهو عايز *** غير ناس تفكر فييييه
أو حد يوم جايز *** يمسح دموع في عنيييه
غيره مفيش حاسس *** باللي يبات يداريه
غير ربك الحارس *** والجنه باقياااااله

مسكين وحاله حال *** بكاني على حاااااله
غلبان وعنده عيال *** والصبر راس ماااااله
وليل نهار شغال *** زي الحمار حاله
ما الارض مش أرضه *** والمال مهوش ماله



القصيده السابعه:




ملحوظه : القصيده دي كنت كاتبها هديه للأخ العزيز محمد عن الخيانه wintar sonata


حوا وآدم


حوا وآدم قصه قديمه
قصه حب بقالها سنين
كان الحب زمان له قيمه
عشق تحدي شوق وحنين

حوا زمان كات نسمه رقيقه
عمر ما تكدب ولا تخون
لو حبتها ان شالله دقيقه
علطول هتخليك مجنون

لكن حوا بتاع دلوقتي
مش قادر انطقها الكلمه
لكن حوا بتاع دلوقتي
لو قلتها هاخد بالجزمه

بتخونك في اليوم ميت مره
وإنت يا عيني عليك مسكين
ولو سألوها تقول انا حره
وإنت يا مطحون شايل الطين

قاعد تخلِص تخلِص تخلِص
حبك غالي ملوهش حدود
طاقه حب لا يمكن تخلص
دايب في عنين حوا السود

حوا إتقلبت وبقت آدم
تشخط تتحكم وتسيطر
والمسكين قدام العالم
بس وجوده مجرد منظر

قصه حبه دي دامت ياما
فاتو سنين مش عارف ليه
عدو ثمانيه بألف سلامه
تعرفو في الآخر حصل إيه

آدم صحي من نومه خلاص
شال الغمه من على عينه
قال بكفايه سنين إخلاص
داب الثلج ما بينها وبينه

فز وقام مـ الدرج التاني
اللي زمان كان فيه مركون
قام وإتمرد كده في ثواني
وما قالشي دي نهاية الكون

واجه حوا كده بتهمتها
جاب ميت ألف دليل ودليل
جت وإعترفت على عملتها
شال من قلبه حمل تقيل

شال السكينه اللي في قلبه
والطوق الموجود في صباعه
قطًع صفحات قصه حبه
مسح الوشم اللي على دراعه

حوا انهارت حوا اتقتلت
أول مره تحس بذنب
حست بالذنب قامت اتشلت
علشان نسيت طعم الحب

طيب آدم ايه اللي حصله
لا !!! ده إتعلم درس كويس
بطل حب وبطل كله
وحلف إنه يعيشها معنس

القصيده الثامنه:





إديني مطلع أغنية



إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
واحد أخينا من طيبته قاعد يصالح في خطيبته
جايب لها وردة يا خيبته قالت له أروح يا عنيه
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
وجارنا كان حتة فشار فهمني إن أبوه طيار
ده عربجي وأبوه حمًار وأمه اللي شادًه العربيه
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
وأخينا ده جاي مـ المنيا ويقولي جاااي من ألمانيا
ما بان عليه الكدب في ثانيه لابسلي كاب عـالجلابيه
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
وفي مرة باكل طبق الفول في شيء حصل كان مش معقول
أمي قالتلي كفايه بقول شاحتين شوية ملوخية
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
وسعيد صبارص كان صاحبي في الشدة كنت ألاقيه جنبي
ديتها سهره تراللًي ودماغي ترجع تاني عالية
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
أنا كنت يوم فاكر اللحمة فاكر كمان إنها طعمه
نحمدو ونشكرو عالنعمة ويارب خلي الطعمية
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
ومرة أخدوني تَحَرِي وقفايا كدة وَرَمْ دوغري
مهمنيش حاجة لأني جوز خالتي صول في الداخلية
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
وأول ما تدخل حتتنا تقابلك الريحه النتنه
مكتوب هنا على بابا بيتنا ممنوع دخول الحراميه
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***
ورحت مرة أنا للجزار قلت أشتري فشة وممبار
بفلوسي جاب لي رجل حمار وقاللي تنفع تسقية
***
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية
***



القصيده التاسعه:




ملحوظه : دي مش قصيده حلمنتيشيه دي غنائيه بس حطيتها في الحلمنتيشي عشان كاتبها من بدري

لما انت مش قد كلامك



لما انت مش قد كلامك
ليه تكدب وبتجرح فيا
إذا كان وانا قدامك
بتمثل من تاني عليا

فاكر لما كدبت وسبت الأيام تجرحني وتكسرني
لكن اول ما اتعذبت اتمنيت ترجع تاني لحضني
واديك تاني رجعت !!
علشان ماانتاش قد كلامك

لما انت مش قد كلامك
ليه تكدب وبتجرح فيا
إذا كان وانا قدامك
بتمثل من تاني عليا

انا هفضل علطول بستنى وبتمنى إنك يوم تنساني
بعد ما خرجتني مـ الجنه تفتكر إني ارجع لك تاني
كل كلامك كدب وياريتك لو أد كلامك

لما انت مش قد كلامك
ليه تكدب وبتجرح فيا
إذا كان وانا قدامك
بتمثل من تاني عليا

خليت قلبي إتعلم يقسى وأنا لسه فيحبك بتعلم
رستني على مليون مرسى وانا سايبك علشان تتألم
نفسي تقول الصدق وتكون مره أد كلامك

لما انت مش قد كلامك
ليه تكدب وبتجرح فيا
إذا كان وانا قدامك
بتمثل من تاني عليا

القصيده العاشره:





وطـــــــــــــ ـــــــــــاويــــــــــــــــــ ــــــــــــــط



عايشين وطاويط
ساكتين علطول
وإن قلنا كلام فكلامنا عبيط

في نهار نايمين
بالليل صاحيين
ماسكين نبابيت علشان وطاويط

بنقول في كلام
ومهوش مسموع
وإن مره سمعته تقول ظغاريط

جناحتنا خفاف
بالرغم ده كله تشوفنا تخاف
وتخاف من إيه محناش عفاريت

قاعدين بنقول ونعيد ونزيد
بنقول شعارات
وكلام وحديت

وهنعمل إيه ماهو صووت مكتوم
طالع من جوه بحر غويط

وعددنا كبير
ملايين ملايين
والخمسين منا يِمْلُو غَبيط

يضربو لبنان
بغداد وجولان
محناش سامعين أصلنا وطاويط

بننام مقلوب
وعيشيتنا كلها بالشقلوب
وإن مره سمعنا رصاصه نطير
ونهيص ونظييط

بنقوم بالليل نفضل صاحيين
علشان بنخاف كده مـ الديناميت

نسمع في صراخ وعويل نايمين
بتزعقو ليه محناش فاهمين
والله وطاويط

يضربو لبنان يضربو حلوان
لو ضربو الكهف بتاعنا كمان
علطول هنطير
ونروح لبعيد
ونعيش وطاويط



القصيده الحاديه عشره:




ملحوظه: الالوان بترمز للشخص اللي بيقول الحوار - يعني الازرق للسواق والاحمر الداكن للزبون اللي راكب

ميكروباص فيصل



سواق الميكروباص :
فيصل طالبيه فيصل – فيصل طالبيه
زبون جاي يركب:
مريوطيه يا اسطى
إركب يالله يا سيدي

يادي الخلق العكره
طبعاً عارفين الأجره
طالبيه بخمسه وتلاتين وطوابق دوغري بخمسين
ورمايه وآخر فيصل والترعه الدور بدورين
فاهمين
فاهمين

إتفضل يا اسطى الأجره وإديني الباقي من فضلك

دول كام يا حبيبي يا عتره فهمني وحياة أهلك

أدي واحد أول فيصل واتنين نازلين طالبيه
وثلاثه في آخر فيصل واتنين نازلين جمعيه
وانا نازل عند الترعه والحاجًه الناصيه الجايه
مديني كام يا أفندي
3 جنيه وبريزة
والله ما يساوو دول عندي
غير دور مـ الجيزة للجيزة

وانا مالي بلم فلوسك
انا راجل نازل الترعه
وان شالله قطر يدوسك
وعربيتك تصبح والعه
إنت يا واد بتهزئني
وإزاي تجرؤ تشتمني

طاب بس يا إيحه يا تلقيحه يا ابو بوز شبرين
يا صابونه غسيل من غير ريحه يا كئيب يا حزين
وقف عندك واعرف نفسك شوف بتكلم مين يا معفن
إلحق خد نفسين من نفسك واسكت لهخليك تتجنن

وغلاوتك لهتبقى في ورطه وتترجاني عشان اصفالك
ده انا جاري يبقى امين شرطه وهخرب بيتك واوقف حالك
راجل كبير راكب الميكروباص :
ايه يا جماعه خلاص استهدو عاملين مشكله على حاجه هايفه
وانت يا استاذ غلطان برضو والناس كلها شاهده وشايفه
انا علشان خاطرك هكبرلك وخلاص حطيت جزمه في بقي

ماشي يا سيدي يكرم اصلك وخلاص متنازل عن حقي
واستمر السواق في طريقه وهو ينادي من الشباك
فيصل أخر فيصل........

تمت بحمد الله

رائع انا قريت شوية مكملتش بس الموضوع شدنى وهكمله
مجموعة ابيات ساخرة رائعة
يارييت المزيد بمثل هذه المشاركات

شعر جميل بس مقدرتش اكمل منخيري غرقت في بحورها

جميل بس ايه يعنى حلمنتيشى
مطلوب التوضيح

ايه يا جماعه هو عبد الرحمن الابنودى اشترك معانا فى المنتدى ولا ايه؟

ايه يا جماعه هو عبد الرحمن الابنودى اشترك معانا فى المنتدى ولا ايه؟

بجد شي جامد جدا وتسلم يا عبد الله بجد

انت يا عبدالله بضارب محمد تيمو في الشعر الي هو كاتبه