عشان انت مصرى ..... ؟؟

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
توصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

منقول

مصرى اه مصرى فعلا ايه الحب ده كله انا عن نفسى بحب مصر وهحب مصر لان مش مصر هى المزعلانى مش مصر هى اللى تعبانى مش هى اللى مغليه الاسعار ومولعه الدنيا نار هى معانا متبهدله ومتعذبه زينا حزينه على نيلها اللى مبقاش نيل حزينه على ليلها اللى مبقاش ليل حزينه على اولادها اللى شافو الويل لو مصر ليها صوت كنت هتسمع انينها لو مصر ليه وجه كنت شفت عرق جبينها ولو بصيت فى عينها هتلاقى كتير دموع الارض بتشكى من العذاب لكن للاسف مصر روح مش جسد تحس العذاب وتتالم وملهاش صوت علشان تتكلم

طبعا مشكور على المرور
وفعلا العيب مش فى مصر
والكل عارف العيب فين وحسبى الله ونعم الوكيل
وشكرا على المشاركة مرة تانية

انا عاوزه اسال سؤال
لو احنا مثلا كشعب مصر روحنا كلنا اليابان
والشعب الياباني كوله جه هنا مصر
ياترى البلدين بعد تغيير الشعبين حيكونو عاملين ازاي بعد 10 سنين؟؟

انا شايف غير كده
المشكله في التعليم
الشعب الياباني متعلم ومثقف جدا ومحترم وحساس .... الخ
احنا شعبنا للاسف مش قد كده في العلم
وبعدين الحكومه من الشعب مش جايين من بره

انا مش متفق معاك فى حاجتين :
1- ان الحكومة مش من الشعب . بديليل ان انت ما تعرفش مين احمد نظيف الا بعد ما مسك الوزار ولو عرفته او كنت عارفه هو ماله ومال السياسية . وكمان الحكومة عمرها ما نزلت للشعب ولا سألت عنه بدليل التأخر الى انت عايش فيه من 28 سنة .
2- التعليم .. اليابان ما فيش فيها جامعات تخرج أكتر من 100.000 طالب ومافيش مجالات ليهم تشغلهم من تدريس وطب وهندسة وصيلة وعلوم وغيرها من الجامعات .. طبعا فى بلدك ده موجود كل سنة كام الف واحد مدرس ومهندس وغيره وغيره واكتر منهم فاشل نهائى من هنا انت بتدفن حاجه اسمه الحرف المهنية ومين الى هيشتغل الحرف المهنية وانت بتخرج اكتر من كام الف من بكالريوس وفى الاخر عاوزة يشتغل عامل او كيدا انا مش معترض انه بيشتغل انا برد عليك فى التعليم . فى اليابان تعالى بقى اصحاب الحرف المهنية ليهم نظرة حلوة أجر كويس احترام أدمى مافيش حاجه اسمها كوسة وواسطة مافيش الكلام ده ما فيش الكلام ده فى بلدك اصحاب الحرف هنا مداسة بدليل ان اى واحد سباك او نجار بيهاجر فى السعودية وما يحبش شتغل فى بلده عشان كيدا .. قياادات البلد ده بقى الى بيكون متعلم عالى واحد دكتواره اقتصاد وعلوم سياسية وهكذا كل واحد فى مجالة وبتلاقى شاب صغير عنده فكر ولسه دماغه شغاله .. مش واحد عنده 80 سنة ولا واحد زى أحمد فتحى سرور دماغه خلاص أدمرت اساسا (( على اساس انه كان بيفكر قبل كيدا )) .
3- الفقير فى دول اوربا بيكون عنده عربيه اقل حاجه . عندك فى بلدك الى عنده 128 يعتبر مش من محدود الدخل قالها واحد فى التلفوين فى برنامد مصطفى بكره فى قناة الساعه .
شكرا على الرد ومشاركتك وعلى النقاش معلش طولت عليك .

الموضوع اكثر من رائع والمناقشة جميلة ومفيدة وانا مع ادمن فى رأيه

كرا على الشعر المحبط ياادمن
ده بدل ماتدينا امل

العفو يامحمد
بس انا نقله
مش اللى كاتبه
لاقيته شعر احبطنى قلت انقله ليكم علشان المشاركة

بصراحه يا جماعه ده حال الكل
وعشان انا مش مصريه بقلكم انو حالنا مش افضل من حالكم
والشعر ينطبق عليكم وعلينا
وشكرا على الموضوع