يوميات موظف قطاع خاص

الصبح بدري الساعه 7 المنبيه تررررررررن ....... دب دش ( وقع في الارض أصلي رزعته علشان يحرم يعمل دوشه ...
بعد ربع ساعه تررررررررررررررررررن بيرن تاني غلاسه


بعد خمس دقايق منبه الموبايل يييههههه خلاص حاصحا اهو ..
الساعه 8 صباحا الواحد يدوب عرف يقوم بالترتيب وانا خارج من تحت السرير ادور الأول علي المنبه المسكين اللي طار في الهوا من نص ساعه


طبعا لو صاحي بدري وفي وقت ممكن أفطر في البيت وكوباية الشاي المتينه ( طبعا انا اللي بعمل الفطار لنفسي بما اني مغترب )
لو متأخر السيناريو يختلف مش مهم الفطار بس المهم كباية الشاي
لو متأخر قوي يبقا مفيش بد اني أخد معايا الشاي في العربيه ...


ملحوظه : بعد كام يوم أمتشف ان مفيش ولا كوبايه اعمل فيها الشاي في الشقة طيب راحوا فين


أكيد كلهم في العربيه


اللي بيشتغلوا في القاهرة حيحسوا بقيمة اللي جاي
طبعا بما ان شغلي مش في القاهرة بيني وبين الشغل أقل من عشر دقايق ولازحمه ولا اشارات B)
اه وصلنا الشغل
اذا موظف الامن اللي في البركنج قديم مفيش مشكله
اذ كان جديد حيجي ناحيتي صباح الخير يافندم ... صباح النور .... ممكن أتشرف باسم حضرتك ...... ليه .... علشان نسجل بس رقم العربيه .... يابني ماهوا انتم واخدين رقم العربيه وصورة الرخصة في مكتب الامن ...... معلشي يافندم اصلا انا جديد وهيا دي التعليمات ....
طبعا انا احيانا بغتت ومرضاش قولوا اسمي
الاقيه بيقولي طيب مفيش شكله ياباشمهندس فلان
طيب اسمي فلان .. مع العلم اني داخل علي سنه في الشغل ده .
اذا وصلت بدري خير خدخل الاجتماع بتاع الصبح قبل المدير العام يبقا الحمد لله
القاعده مع المدير العام اذا هوا وصل بدري يبقا الناس اتاخرت ليه .. اذا متأخر وايه المشكله يعني يتأخر الاجتماع .
اذا وصلت متأخر اه يبقا حنسمع كلمتين علي الصبح
اذا وصلت متأخر قوي زي النهارده يبقا اخدها من قصيرها وبلا ش ادخل .

اه زي النهارده ناس حتقولي النهارده الجمعه انا مبخدشي اجازه الجمعه لاني باخد اجازات مجمعه كل ماربنا يسهل ويهدي عليا المدير العام علشان اروح بيتنا في مصر يعني حسب التساهيل كل 30 او 45 يوم ممكن اخد اسبوع .
بعد الاجتماع وكل اجتماع بظروفه أحيانا نص ساعه واحيان ساعتين ونص ممكن تعدي سلامات وممكن يبقا فيه زعابيب وممكن اتزعبب انا علي الناس


محدش يسألني يعني إيه زعابيب علشان انا جبتها بالعافيه .


اثناء الاجتماع اذا السيد المدير العام بعت لسيادتي ايميل امبارح الساعه عشره بالليل بعد ماروح بيتهم يسألني الصبح ها عملت ايه في الموضوع الفلاني
أنا : انهي موضوع معنديش تفاصيل .
هو : مانا بعتلك ايميل امبارح ... مهوا انتوا لو بتابعوا شغلكم .. وخد عندك ( بالمناسبه المدير العام اجنبي ) فالحوار انجليزي بس هوا بيبتدي الحوار في الحلات دي بكلمه عربي وحيده يعرفها الا وهي مش ممكن


العكس بقا


انا بعتله ايميل بموضوع مهم من اسبوع ونسي وجه الصبح يسال عنه فانا طبعا فرصه
حاكبسه واقولو انا بعتلك الموضوع ده من إسبوع
تفتكروا بيعمل ايه
يقلبها هزار وايه ده هوا انا عندي ايميل .. لا بجد والله .. أنا مكنتش اعرف
طيب حابقا اشوف وارد عليك



إذا عجبتكم أكمل .... وياريت حد يقولي اني مش لوحدي اللي كده

نبتدي بقا أول ماندخل الاجتماع الصبح

أهم حاجه تكون داخل معاك كام ورقه وقلم طبعا مش مهم فيهم إيه ( لزوم الاجتماع ).
ولازم تكون مذاكر كل اللي حصل امبارح واللي مطلوب يحصل الاسبوع الجاي وكل البلاوي اللي بتتحدف عليك .

طبعا احيانا بتكون فيه تحالفات .. دا متفق مع دا علي الموضوع الفلاني او دول متفقين النهارده علي ده . ودول مربطين مع بعض قبل مايدخلوا
( يعني مش حتكلم في الموضوع الفلاني بس انتي متتكلميش في الموضوع الترتاني ) وبجد بيبقا حظهم زفت ويومهم مطين يوم مايتفقوا عليا لاني بقلب الترابيزه . واالمصلح الشائع عني في الشغل اني اول مايقلب بيقطع هدومه مش بالمعني الحقيقي يعني مببقيش علي حاجه .

مش مهم تكون مركز قوي كل مره بس أهم حاجه تكون مركز قوي أول ماحد يتكلم عليك او علي شغلك أو يجيب سيرتك .وخليك كول محدش يستفزك
وتشخبط شويتين في الكام ورقه اللي قدامك لزوم الشغل يعني

طبعا عندنا الاجتماع مختلف شويه لأن الموظفين من أكتر من جنسيه اغلبهم اجانب ايشي طلياني علي الماني علي بلجيكي .
طبعا اول مادخل ( بنظام هلب يورسيلف ) أعمل كباية شاي تانيه لنفسي علشان نافوخي يعرف اني صحيت .
ودلوقتي تتعرفوا علي الشخصيات اللي في الاجتماع .

اولا السيد المدير العام ودا كل يوم ليه فريسه يكون اصلا جاي من بيتهم ناوي عليه .
اهم حاجه علشان متكونشي الفريسة انك تكون مقفل كل شغلك ومحدش له حاجه عندك وانك ترد بثقة .... علي فكره مش دايما مهم يكون ردك صح بس المهم جدا انك تكون بتتكلم بكل ثقة .

الشخصية التانيه
الشخصية اللي بتدخل وتقول ياأرض داريني أو خبيني يفضل مخبي نفسه وساكت لغاية لما الليله تعدي . الناس دي بحب انكشها قوي

شخصية 3
ودي شخصية المعترض دائما مش مهم بيعترض علي ايه المهم انه يعترض وخلاص . عندنا واحد منهم
الشخصية الرابعه ودي الشخصية الحقنه اه الحقنه اللي يعمل أو تعمل اي حاجه علشان توقع الناس في بعضها ( عندنا اتنين منهم ) . ودول بكرههم جدا بس بعرفهم بسرعه . ( خليكوا فاكرين الشخصية دي ).


الشخصية الرابعه : اللي قاعد في حاله بس لو ليه حق حيجيبه لو قعدنا لغاية الصبح ومحدش يعرف ينكشه ويعدي بالساهل وياسلام لو حد غلس عليه او حاول يغتت عليه يبقا ليلته سوده بجميع اللغات ودول منهم تلاته العبد لله واحد منهم B)
بس لما بنلطش مع بعض يبقا ليله ملهاش اول من اخر واحيانا بيحصل . التلاته اعند من بعض .

بعد ماشفتم الشخصيات نخش المكتب ونبتدي الشغل

اول مادخل المكتب ابتدي اعمل اجتماع سريع مع الناس اللي شغالين معايا اشرحلهم اللي حصل الصبح ومطلوب من القسم بتاعنا ايه وتوزيع الشغل ومين حيعمل ايه ( مهم جدا تعرف الناس اللي معاك ايه اللي بيحصل ) ( علشان محدش يعمل عبيط ويقول معرفششي أو محدش قاللي )
وطبعا مين اللي حنطلع عينه النهارده ودا غالبا بتكون الشخصية الحقنه .

وبعد كده افتح الكمبيوتر ,


طبعا طولت عليكم

ايه المطره دي ..................
عايزين تعرفوا طبعا ايه المطره دي ....
ها اكمل
أشوف تعليقاتكم الاول ...

نبتدي بقا نشوف يوم الشغل
بعد الاجتماع مع المجموعه بتاعتي ووزعنا الشغل علي كل واحد
نرجع للمطره فاكرينها

الايميلات اللي بتهل عليا الصبح دي أول حاجه بشوفها لما ابتدي شغل ( ايميلات الشغل طبعا ) هيا دي المطره عادة بين من 25 الي 45
طبعا اشوف اللي ليه لزمه أرد عليه واللي ملوش يروح File 13 اللي هوا Delete بس بالسيم بتاعي

لغابة دلوقتي ضارب اتنين شاي من الصبح اه يبقا دلوقتي النسكافيه
طبعا أثناء دا تليفونات في كل الاتجاهات وتلاقي المكالمة فيها 3 لغات يعني مثال
بنجورنو
طب بنجورنو مين
فلان
ازيك عامل ايه
وبعدين يرجع يقلب طلياني تاني
يدوبك اجمع كام كلمه افهم منهم الموضوع وارد عليه انجليزي
واثناء المكالمه يرن الموبايل (كاك دي لا) ودي روسي معرفشي عندهم كاك أداة استفهام تقريبا ليهم أصول في قهة الكتاكيت . وهكذا
بعد شويه مكالمة من مكتب المدير العام عايزيني ربنا يستر
جودمورنينيج
وش علي الصبح هوا انتا مخلصتش الموضوع الفلاني ليه
ماهو انا قلتلك امبارح انه واقف في الحتة الفلانيه ومش حينفع يخلص غير لما يحصل كذا
لا بس فلانه قالتلي من شوية لما سالتها ان الموضوع واقف عندك ( فلانه دي الحقنة اللي قلتلكوا عليها ) أول ماتتواجه مع المدير العام ترمي الشغل علي أي حد وكام حقنه كده علي الماشي ..
أنا طبعا في سري طيب خدي دي
ماهو أصل الموضوع الفلاني دا........... واجيبله اصل الموضوع من الأول .. وهوا من النوع اللي بيحب الشرح بالتفصيل الممل وممكن نمسك ورقه وقلم واشرح الموضوع من أوله وهوا يشخبط شويه وانا اشخبط شويه لغاية لما يتوه مني .

وطبعا احنا مش ملايكه لو حسيت انه حيزنقني ويحطني في خانة اليك أبتدي أدخله في تفاصيل فنيه غتيته أصلا نص الكلام غلط بس المهم يكون بثقة ونظام بقا إثبت إن أنا مش أنا لغاية لما الراجل ياولداه يتوه مني
بصراحه أحيانا بيصعب عليا من اللي بعمله فيه

الست حقنه دي بقا شخصية لزجة لما يكون ليها مصلحة تلاقيها الصبح ناكشة شعرها وداخلة المكتب عندي صباح الخير ياجميل ايه اخبار مزاجك بقولك هوا انا كنت عايزه منك خدمة .
أنا بقا من النوع الغتيت مع الأصناف دي مع العكس مع الناس المحترمة ارد عليها ياسلام شبيك لبيك
طيب انا عايزه تساعدني في كذا وكذا ..
أنا بقا : أه بسيطه بس هاتي موافقة فلان ولازم فلان يكون عارف وبعد ماتبعتي ايميل للجهة دي
طبعا علي بال ماتعمل الكلام دا تكون مالطه خربت

بالعكس مع الشخصيات الكويسه حتي لو عايزين حاجه مش في نطاق شغلي مفيش مشاكل نساعد
بس اكتر حاجه باتمسك بيها في الشغل المواعيد يعني لو اديت ميعاد لحد اعمله حاجه لازم التزم لو علي جثتي بس لازم يكون متناسب مع الطلب ودي أحيانا بتضايقني من ناس يعني حد يقولك انا عايز الموضوع الفلاني اقوله اوكي دا حياخد ساعه يرد مينفعشي كمان نص ... هوا يعني لو كان نص هوا انا كنت حاقول ساعه

اخر حاجه بقا اوجع دماغكوا يبها الاجازات
باسلام لما اطلي اجازه فاكرين الراجل المدير اللي كان بيصعب عليا من الي بعملوا فيه اهو بيجي في موضوع الاجزاه ده ويطلع عيني ولازم اسايسه
أول حاجه الفصال اكون عايز اسبوع يقوللي لا مش ممكن 3 أيام بس اقوله لا خليهم 6 في الاخر يرسوا علي خمسه .......... بقيت بعد كده لما اطلب أجازه اطلب بزياده علشان الفصال
وبعد مايوافق علي الاجازه يقوللي بس قبل ماامضيلك عليها تكون خلصتلي دي ودي ودي ودي
لسته تقريبا بيقعد يجهزها من اسبوعين .. وقال ايه لازم انا اللي اعملها مش حد من الناس اللي معايا . طبعا علشان اخلص منه لازم اخلص الحاجات دي

كده ونكتفي بهذا القدر لأني وجعتلكم دماغكم قوي

ودلوقتي مين اللي حيقولنا يومياته في شغله سواء خاص أو عام أو حتي شغل خاص مين قال أنا ها
المصدر : http://www.haridy.com