يوميات موظف طموح - 1

إبتعدت عن التدوين في الإسبوع الأخير لإنشغالي مع الحبيبه مريومه والرجوع الى السلك الوظيفي مرة أخرى بعد إبتعاد ثلاث سنوات قضيتها كطالبه علم في ربوع بريطانيا.

هذه التدوينه بتكون عباره عن سلسله من اليوميات أحكي فيها حياة الموظف الطموح في مجتمعنا.

الموظف المجتهد الملتزم الطموح في كل يوم يحاول يوصل شغله قبل وقت بدء العمل… وعشان يكون في كامل لياقته الذهنيه والبدنيه لابد أن يكون قد أخذ قسط كافي من النوم …

نام بكير تصحى بكير … تشوف الدنيا كيف بتصير…. (هالكلام لناس يعرفون نفسهم عدل)…

إذا الموظف يبتدي عمله في الساعه السابعه والنصف ومنزله خارج حدود منتصف المدينه عليه على الأقل أن يتحرك قبل بدء العمل ب 45 دقيقه كي يصل وتهدى أعصابه من ضغط السواقه في زحمة دبي…

إذا طلعت متأخر … تتوتر أعصابك .. تفقد السيطره على التركيز
ألم في الراس حموضه في المعده… واللسان شغال في السباب واللّعن والشتم

تصل مكتبك وإنته محتاج على الأقل ساعتين حتى تستعيد قدرتك على مزاوله الأعمال

أفضل جزء في الحظور قبل موعد العمل بفتره وجيزه هو أنك تقدر تجلس وتقرأ الصحيفه من غير إحساس بتأنيب الضمير …. هذا إذا كان فيه ضمير!!!!

أما من يحضر متأخر فهو يركض ركض ليبصم على جهاز الحضور والإنصراف … ودقات قلبه متسارعه خوفا من أن يتم توبيخه أمام باقي الموظفين… ويدخل مكتبه وعينه المتلصصه تتجول على وجوه الجالسين خوفا من أن يكون أحد قد إكتشف تأخره

طبعا هذا إذا كنت إنته موظف عادي… أما إذا كنت مدير فالكلام يختلف

ودمتم،،،،،،،،،

منقول من :http://www.7rouf.com/

هممم “نام بكير تصحى بكير … تشوف الدنيا كيف بتصير” قاعده حلوه وجميله وكنت أطبقها بس كانت القاعده أكثر صرامه وعسكريه لي في الصيف اللي طاف, فكان النوم لي إلزامي من الساعه 9 مساءاً, ويبدأ يومي من الساعه 3 الفجر لين الساعه 9 وعلى هذا المنوال لكن تخربط علي الجدول, وبرد أعدله هذا الصيف ان شاء الله =) نصيحه جربوا هالطريقه وخبروني برأيكم

أما بالنسبه لزحمة السير, بصراحه الزحمه تييب التوتر لي وأعتقد أي حد بيتوتر من زحمة السير, وغير مخالفات التجاوز من اليمين والأخطاء المروريه الصارخه من صباح الله ووو فالواحد أحسن شي يسويه يحاول يهدأ ويحط الرحمن في صدره ويربط حزام الأمان ويتوكل على الله يوم يركب سيارته ويقرأ دعاء ركوب الدابه, واللي الله كاتبه مقبول

بالنسبه لبداية يومي العملي, أول شي أفتح بريدي الإلكتروني الخاص بالعمل, أشوف اذا وصلني شي ايميل يديد وأرد عليه اذا كان يحتاج رد مني, وأمسح الإيميلات اللي مالها داعي

وبالنسبه للجرايد اليوميه توصلني عن طريق الأوفيس بوي, وبالمره أعطيه كوبي عشان يضبط لي شاي “كرك” يعدل لي المزاج, وفي خلال هالوقت أقرأ الصفحة الأولى من الجرايد + الأعمده اليوميه اللي أتابعها بإستمرار قراءه سريعه على بال ما يوصلني كوبي, وفي بعض المرات اذا وصلت الدوام بسرعه ومحد موجود أسير وأضبط لي الشاي بنفسي بحيث يكون زاهب وقت الضروره =)

وبالنسبه “للطموح” , حلو الواحد يكون عنده طموح, بس اذا كانت بيئة العمل “قاتله” و”روتينيه” ما أعتقد الطموح بينفع صاحبه, وفي وجهة نظري الطموح لازم يبدأ من مكان العمل اللي فيه الموظف, بحيث هذا المكان يحاول يوجد ويخلق بيئه عمليه ناجحه من كل المقاييس سواء العمليه أو العلميه أو حتى المهنيه