إضرب ودوس ..شعر عامي ..

أضرب ودوس
***************




إضرب ودوس
خلي الكرامة ف يوم لعين زي النعال

إضرب ودوس
لاجل
السياده والرياده
لجل ال- جمال –

اضرب وعفّر ع الكرامة بجزمتك
الخوف خلاص
خلي الكرمة تدوب ف لمحة سحنتك ..

حط السياده في البياده وع القفا
خطي بهدووووء
دوس الوليد
شد البعيد
خلي الطليق تجري وراه
احضان واشواق طلقتك

إرفع عصياتك للسما ..
وانزل علي ضهري
هنا
اضرب وعلم في العروق معني
الخنوع
اضربني وازرع من حنانك الف جوع

ولا الحنان في الكهربا ..
مهي اصلها
بتخلي لحمي ينكوي
-لاجل الدفي-
وتخلي قلبي ينشوي
لاجل الشفا ..
وتشيل مرارة
بتشكي روحها لربها

تجي وتنفض ف العيال جوه القفص
"يابن الجبان
ابوك وامك من زنا
واختك علي الناصيه
تدور ع الزبون
علي رزقها
بس العيون لينا
بتعرف شغلها"

اشتم كمان أصل الشرف
إلعن ف يوم
كل العفاف
كل الي خاف
كل الي دافع عن
يمامة ف ضلته
كل الي
يبكي علي الوطن
علي تربته

إلبس سواد .. ماله السواد
هو الشياكه كلها
خلي الضلام فوقك
مهو اصل شمس الحق باعت عرضها


و تجز ليه علي شفتك

انا شعب يرضيه الرغيف
حتي ولو زفت وخفيف
حتي ولو ماتت نهي
جوه الطابور
حتي ولو كان التمن
مليون خابور


عايش سنييييييييين
عايش مهان
عايش سنين
طيب جبان

كان ليا دين من عند رع
ونبي امين
حفر الترع

ومعاه وزير داس البشر
بأسم الاله
هرس النفوس
بلع الفلوس
ومعاه كلام كان اتنشر
تحت الهرم
ومعاه برادي تتقري

"إضرب ودوس
لاجل الفلوس
لاجل الكراسي
والسياسي
والتيوس
لازم تدوس "

وانتهت كلماتي

عندما تتلاقى النبضات

يبدأ الحب

وعندما تتداخل النبضات

يتوهج الحب

وعندما يصبح شريك نبضاتك

هو نفسه شريك حياتك

تصبح الدنيا كلها

نبضة حب