فضفضه في حاجات مستفزه جدا

ازيكوا يا اعضاء ياحلوين ... النهرده الموضوع غريب و عجيب !!
ازااااااااااااااي ..؟ طبعا انتوا اللي بتسألوا
اقول ... اولا طول ما احنا ماشيين في الشارع... في الحاره... في البيت.. في اي حته او اي زخنوق ... بنلاقي حاجات مستفزه .. حتي يوم ما نغلط و نتفرج علي التليفزيون (سواء الدش اول محلي) بيجلنا عته و تخلف في المخوخ ...
طبعا الحاجات دي لازم نقولها ... حتي لو ابسطها ...
اولا من الاخر كده الموضوع انا اللي حرغي فيه علشان انا مفقوعه من حاجات كتير و انتوا بس اسمعوني و يا ريت كمان تكملوا جميلكم و تردوا علي الموضوع و بعبروا عن رايكوا ... تمام؟ و الله انا عارفه ماحلاقي رد واحد هنا بس يلا نجرب..

اول موضوع بيفقعني ....

الاعلانات ...( المصري منها او الخليجي )

و من هذه الاعلانات ... اعلان ... سنسوداين واقي المينا ( او عموما اعلانات معاجين غسيل الاسنان)... اللي بيجي اثناء عرض مسلسل (يسرا ) الكأيب علي قناه دبي ...

يعني اولا الاعلان ده بيجي عشرميت الف مره ... مره مختصر قبل عرض المشاهد من المسلسل .. و بعديها بيجيوا الاعلان كامل ... طيب الاعلان بيقول ان المعجون ده بيقوي المينا بتاع الاسنان .. طب بذمتكوا ده كلام مقنع ..؟ طيب ان اديك حتنزل حته من المعجون علي فرشتك .. و افرك يا عم في سنانك .. و بعدين تمضمض بقك ... ازاي بقي يرجع مينا الاسنان اذا انت ذات نفسك بتشيله .. ما انت مش معقول حتمشي زي بابا نويل بشنب فيه معجون !!
كمان خد عندك دي ... سيجنال تو .. واقي من التسوس 24 ساعه ... ازاي؟؟ اذا كان التسوس جوه الضرس من تحت في الاعماق ازاي المعجون بالصلاه علي النبي كده يشيل التسوس ... ثم من امتي يعني التسوس بيكون بره الضرس !!
اذا انت لما بتروح دكتور السنان و تدفع دم قلبك ... و في الاخر مش بينصحك تستعمل سيجنال تو .. ؟؟ منين بقي بيجيوا الدكاتره اللي في الاعلانات و يقولوا استخدموا المعجون العلاني اصله بيمنع التسوس ... لو كان اصلا بيمنع التستوس ... ليه بنروح دكاتره الاسنان ... هل هذا معقول يا جماعه ؟؟ مش حاجه تفقع ...؟
و ازاي تغسل سنانك مره بالمعجون و يحميها 24 ساعه ...؟ ده انت طول اليوم بتاكل فول و طعميه و دي بحد ذاتها اسلحه ذات دمار شامل ... ده غير الببسي و الشاي و احنا المصريين اعصرنا ينزل شاي العروسه ... و تقعد قافل بقك علي الاكل ده كله و في الاخر المعجون يحمي السنان !!

مش حاجه تفقع بجد !!

كمان اعلانات الخليج ...
يا لهوي دي كوم لوحده ... اعلان داناو مثلا
مافي دناو مافي عصير ... لا بقي ده فيه !
و يجبلك راجل طول بعرض و عامل زي الاهبل مافي دااااااااااانااااااااااااااااااااااو ... يا هيافتك يا اخي !
و الغريب كمان ... تلاقي اعلان طويل عريض يتكون من .. حصان بيطير ... و صقر بيجري في الصحراء .. و عربيه 4 باي 4 تجري في الصحراء برضه ... و سحب .... و اعاصير ... و ما تفهمش الاعلان عاوز يقول ايه ؟؟ و تلاقي مثلا في الاخر الاعلان عن معجون حلاقه !
ده نبذه مختصره عن اول حاجه بتفقعني في حياتي و بالذات في شهر رمضان ...
يا تري ايه رايكوا .. هل شايفين ان عندي حق في فقعتي دي ؟؟ و لا العمليه عاديه بالنسبه ليكوا ؟؟
يا رب حد يرد عليا .. ان شاء الله المره اللي جايه الفقع مستمر ... و الموضوع متجدد ان شاء الله

و اي حد مفقوع بقي يقول و خلاص اهي كلها فقعه بفقعه !

بنات اليومين دول


منقول

البنات بقت غريبه و الله !! و سبحان الله من المحجابات ... حجاب ايه اللي لابسينه ده ...!؟ محزق و ملزق و في الاخر مغطيه شعرها طب بزمتكوا الولاد حتبص علي شعرها اللي باين و لا جسمها اللي متفسر بالحاجات الضيقه دي ...؟ طب ايه لازمه الحاجاب ساعتها ؟؟ هل للدرجه تغطيه الشعر اهم من تغطيه الجسم؟؟ دي الغايه من الحجاب..؟ طب انا مش محجبه بس بلبس محتشم عن المحجابات و افرض اني مش بلبس محتشم ساعتها حيبقي عادي بس ما اكونش مغطيه شعري و اقول : اصل لازم اتحجب .. و البس بقي ضيق..
ثم ايه اللبس الغريب اللي المحجابات اللي بتلبسه ..؟ انا حاسه ان الحجاب بقي مجرد موضه او البت مكسله تعمل شعرها فا قامت رقعه حجاب علي شعرها ...
تلاقي البت من دول لابسه حجاب و ياعيني يا كبد مامي مغطيه شعرها اصل حرام الواد يشوف شعرها و في الاخر خد عندك ميني جيب لفوق الركبه و تغطي رجلها ببوط برقبه طويله ... او بلاش اللي طالع ايه بقي جيبه قصيره و تحتيها بنطلون استرتش ضيق ... او بلاش تغطي شعرها و تبين القصه ..( اصلها لسه صابغه شعرها لازم نعرف اللون اللي فقعته في شعرها!!)
ايه الحكايه ...؟ ولا دي ... تبقي محجبه و لابسه جيبه بس قصيره و الصندل بتاع ( أليس في بلاد العجائب ده ) طب و الله انا حزينه بالغرم تاني مره انا بقول مش محجبه بس يعني حرام اللي بيتعمل في الزي بتاع الحجاب ده و المفروض من الحجاب انه بيستر مش بيعري !!
و كمان اللي يفقع تلاقي واحده من دول اللي لابسين حجاب نص كم ده بيجوا للبنت اللي مش محجبه و اللي بتكون ساتره نفسها اكتر و يقولوا : انتي مش محجبه ليه !!!
طبعا الموضوع اطول من كده بس ده اللي جه علي بالي دلوقتي !!

فعلا حجات مستفزه
الشباب اتخنق مش عارف يعمل ايه في البنات دي ما يجيش طوفان يشيل النوعيه دي
والاعلانات الواحد بيبقي مركز في المسلسل يلاقي مره وحد كل خمس دقائق نس الاعلان بيتعاد ايه ده يعني الواحد بيبقي مخنوق فيتهو ويتفرج علي التلفزيون يقومو يخنوقونا اكتر

موضوع حلو يااهلاوى
انا اكتر بتخنق منها العضو اللى يدخل يرد على موضوع ويقول ( مشكوووووور - شكرااااااااا - راااااائع )
ده بيدخل يقضى واجب ويخرج
والحاجة التانية العضو اللى يدخل ينزل افلام او يقرا مواضيع من غير مايشارك
ياخد بس وميديش

انا بتضايق من اللى يرن رنة على الموبايل ويقفل
او يبعت رسالة كلمنى شكرا
طيب متكلمنى انت
والحاجة اللى تنرفز برده
لما حد يديك ميعاد وميجيش او يتأخر عليك

اشكركم على الاهتمام والمرور وردكم ومشاركتكم الموضوع