من طرف سندباد الأربعاء مايو 27, 2009 4:54 pm
انا جايبلكم النهاردة يوميات جديدة من منتدى الشباب
ادمن : أنا كنت عايز أناقش معاكم فكرة كده
سيسى: خير اللهم اجعله خير
ادمن : هى قواعد الكتابة فى المنتدى حاليا كام صفحة
نودى : 25 صفحة تحتوى على 3000 بند
ادمن : أنا عايزكم تخلوها 100 صفحة تحتوى على ما لا يقل عن 50000 بند ...لو عرفتم تخلوها أكتر من كده يبقى أحسن
تيمو : مش كتير كده يا عم ... ده اللى مسجل جديد على ما يقراها تكون سنانه وقعت
عيد : ما هوه ده المطلوب ياعم ... مش عايزين حد يقراها ... وصلت الفكرة يازغللة
سيسى : فكرة بمليون جنيه ... الكبير كبير صحيح
الاء: ما تفهمونا إيه العبارة ياخوانا
عبدالله : يعنى اللى هيسجل جديد لازم يوقع إنه قرا قواعد الكتابة فى المنتدى ووافق عليها ... تمام
الاء: تمام
عبدالله : طبعا لما يلاقى 100 صفحة تحتوى على خمسين ألف بند هيروح موقع من غير ما يقرا حاجة...تمام
الاء :لأ مش تمام .... مش فاهمه حاجه
عبدالله: هو انتى ديما كده يا الاء خلاص سلميلى بقى عالمترو....أى حد يكتب حاجة ما تعجبناش نروح لازقينه إنذار ونقول له إجرى يلا روح إقرا قواعد المنتدى قبل ما تكتب داهية فيك وفى أيامك السوده
لف ايجيبت: طب إفرض عضو غتيت ورخم قرا القواعد كلها قبل ما يوقع
سيسى : من لم يمت بالسيف مات بغيره .... مين يعادينا ... هيه هيه
عيد بيقول لتيمو: نبه على جميع المشرفين إن فى إجتماع هام الساعة 3 فى قسم المشرفين ....الإجتماع مغلق وسرى للغاية
تيمو: بخصوص إيه
عيد : أنا عن نفسى معرفش يظهر إنه توب سيكرت .. ادمن حويط اوى ....مش عايز حد من الأعضاء يشم خبرعن الإجتماع
تيمو : رقبتى ياريس
فى منتدى المشرفين الساعه 3 بدأ اجتماع مغلق وسرى للغاية بحضور جميع المشرفين
ادمن : طبعا مستغربين أنا جمعتكم ليه النهارده ... الموضوع باختصار إن فيه معلومات وصلت للقيادة السياسية إن المنتدى فيه عدد كبير من الأعضاء بيكتبوا ضد الحكومة وضد الريس نفسه وتوريث الحكم...وصلتنى معلومات مؤكدة إن الريس قرر يقوم بزيارة للمنتدى والتجول فيه بنفسه لمعرفة مدى صحة المعلومات دى...لازم نلم نفسنا بسرعة ونستعد للزيارة اللى غالبا حتكون الأسبوع اللى جاى
عيد : إحنا جاهزين يابوص ... لازم نبتدى نلم كل المواضيع اللى بتتكلم عن الريس ونحذفها
رضوى : تمام ونخلى المواضيع اللى بتقول كلام كويس عنه
ان انجل: مفيش مواضيع كويسة عنه غير الموضوع بتاع جرجاوى (نعم وألف نعم ياريس)
ادمن : مين جرجاوى ده
ان انجل : ده بيبيع جرجير....قصدى عضو جديد وله ولاء شديد للريس
ادمن : عظيم كلموه يكتب كام موضوع زى ده ووفروله كل الإمكانيات اللى هيحتاجها
الاء : إمكانيات زى إيه يعنى
ادمن : مساطر برايات اساتيك اقلام....كل حاجه
سيسى : عايزين نستعد للموضوع ده بكل جدية ياجماعة....زيارة الريس للمنتدي شئ مش بسيط خصوصا فى الظروف الدولية الحالية....متنسوش إن البلد دلوقتى بلد نووية يعنى الأنظار عليها
ادمن : مالك يا سيسى إنت عيان
ان انجل : لازم ياجماعة نحضر قصيدة نلقيها عند وصول السيد الرئيس
الاء : فكرة هايلة....فى مين شعراء عندنا
سيسى : خليك فاكرنى....ياسلام...أعجوبة....ده لو قلت له صباح الخير يروح هفك قصيدة ستين بيت وما يخلصكش من إيده غير إنك تقول أنا جدع
تيمو : أظن عيب أوى يا سيسى أبقى قاعد جنبك وتدور على شاعر يكتب القصيدة.....أنا ليا حق عرب عندك....وحياة طنط الاء مهنسهالك
سيسى : بس إنت يا تيمو يعنى ولا مؤاخذة ما بتحبش الكاكى...واللى جاى ده كاكى واللى جابه كاكى واللى جاب اللى جابه كاكى
تيمو : معلش ياعم الضرورات تبيح المحظورات....قل لى إيه رأيك فى الحتة دى
يابلدنا يامهلبية
ياحلوة يامستوية
والريس خلاكى آية
حسنك مالوش نهاية
ادمن : معلش يا تيمو...اتفضل إنت روح إستريح شوية...فى مين تانى شعراء عندنا
عيد : اطلال ...دى شاعره جامده جدا...أنا مبفهمش هى بيقول إيه بس هايله
ايمان : أنا موافقه على اطلال لإلقاء قصيدة الترحيب بالريس....ندخل على النقطة اللى بعدها فى جدول الأعمال.....تنظيم موكب الريس
لف ايجيبت : أنا رأيى إن موكب الريس يدخل من باب السياسة الداخلية
نودى: مش هنرش المنتدى يابوص
ادمن : إيه المناسبة
نودى: مش جايز الريس يكون فى جيوبه جراد وأول مايدخل ينطرهم علينا
ادمن : إنتى مين يابنتى ...إنتى بقالك كتير معانا هنا
تيتو : فعلا الإحتياط واجب...أول ماييجى ندلق عليه جردل فنيك
ادمن بيتكلم مع عيد : أول ما الزيارة دى تتم على خير الطقم ده كله لازم يتغير
عيد : هنجيب مين بس يابوص
ادمن: أى حد إن شالله المخبول سندباد
ان انجل : بمناسبة سندباد ... ده هنسيبه كده والريس جاى ؟؟؟....أنا رأيى إننا نطرده مؤقتا لحد ما الزيارة تخلص وبعدين نرده بدل ما يعملنا قلق
ادمن : ونرده ليه....مشيه خالص
تيتو : مالوش لزوم نعمل طرد أو ندى إنذارات اليومين دول.... بالنسبة لسندباد هوه كان كاتب قصة مؤرفة أنا حذفتها...رجعوهاله خلوه يتلهى فيها لحد ما الزيارة تنتهى وبعدها إرموه هو وقصته فى الشارع
مش عايز حد يزعـــل